الـ Client مش تايه، انت بس لسه مسألتوش الأسئلة الصح
من فترة كنت قاعد مع حد بيشتغل Account Manager وبيحكيلي عن Client بعتله Brief من 4 سطور
السطر الأول: عايزين نعمل Campaign
السطر التاني: الـ Target هم الشركات
السطر التالت: عايزين حاجة Creative
السطر الرابع: محتاجينها ASAP
وبعدين ختمها بجملة: ابعتولنا Proposal
قالي إنه قعد يومين يحاول يطلع Proposal من الـ Brief ده ومش عارف يمسك أول الخيط
قالي: الـ Client مش عارف هو عايز ايه
وأنا سمعت الجملة دي قبل كده، كتير
بس بعد سنين شغل، رأيي اتغير فيها
أغلب الوقت الـ Client بيكون عارف إن عنده مشكلة
حاسس بضغط معين، أو شايف رقم مش عاجبه، أو فيه حاجة في الـ Pipeline واقفة
بس مش قادر يحط اللي بيحسه في كلام منظم
يعني عارف إن فيه ألم في حتة معينة، بس مش عارف يوصفه للدكتور
وهنا فيه نوعين من الناس اللي بتستقبل الموقف
نوع بيقرأ الـ Brief ويقول: الـ Client ده مش عارف هو عايز ايه، الـ Brief ضعيف، أنا مش فاضي أعلمه يشتغل ازاي
وبينزعج ويبدأ ينفذ أي حاجة عشان يخلص
ونوع تاني بيقرأ نفس الـ Brief ويفهم إن اللي مكتوب مش هو المشكلة الحقيقية
بيفهم إن الـ Client بيتكلم بلغة الـ Deliverables عشان مش عارف يتكلم بلغة الـ Problem
فبدل ما يبدأ ينفذ، بيبدأ يسأل
والأسئلة بتفرق
مش أسئلة من نوع: عايز كام بوست وأنهي Platform
أسئلة من نوع: ايه اللي حصل في آخر 3 شهور خلاك تحس إنكم محتاجين Campaign
مين جوا الشركة اللي مهتم بالنتيجة، وايه النتيجة اللي في دماغه
ايه اللي جربتوه قبل كده واشتغل وايه اللي ما اشتغلش
أسئلة بتحفر تحت الطلب وتوصل للأصل والجذر
وفي اللحظة اللي الـ Client يبدأ يجاوب على النوع ده من الأسئلة، بيحصل حاجة مهمة
بيبدأ هو نفسه يشوف الصورة أوضح
كتير من الناس اللي بتيجي بـ Brief غامض كدا و foggy، أول ما تقعد معاها وتسأل صح، بتكتشف إن المشكلة مختلفة تماما عن اللي كانوا فاكرينها
واحد بييجي يقولك: عايز Content
وبعد نص ساعة أسئلة تكتشف إن المشكلة في الـ Positioning أصلا
واحد تاني بييجي يقولك: عايز Leads
وبعد شوية تلاقي إن المشكلة إن الـ Sales Team مش بيتابع اللي بييجي
الطلب اللي على السطح مابيكونش هو القصة كلها تقريبا أبدا
وعشان كده الشخص اللي بيعرف يشخّص مريضه (قصدي عميله) قبل ما ينفذ بيبني ثقة بطريقة مختلفة تماما
الـ Client بيحس إنك مش بتاخد أوامر
بيحس إنك بتفهم
خد بالك بقى، أنا مش بقول إن كل Client غامض يستاهل وقتك
فيه نوع فعلا مش جاد
بيبعت نفس الـ Brief لعشر شركات ولا فريلانسرز وبيستنى مين يرد أرخص
مش عنده نية حقيقية ومش مستعد يقعد يفكر معاك
النوع ده ليه علامات واضحة وبتتعلم تقرأها مع الوقت
بس النوع التاني، اللي فعلا عنده Need بس مش عارف يعبر عنه
اللي محتاج حد يرتب له المكرونة سباجيتي اللي في دماغه
اللي لو حد قعد معاه ساعة واحدة بأسئلة صح هيطلع بـ Direction واضح
النوع ده هو أحسن Client ممكن تشتغل معاه
عشان لما يحس إنك انت اللي ساعدته يشوف الصورة، مش هيروح لحد تاني
المواقف دي كمان بتزيد في الوقت الحالي أكتر من أي وقت فات
الـ Clients بقوا محاطين بآراء كتير متناقضة
كل يوم حد بيقولهم اعملوا Reels وحد بيقولهم اعملوا SEO وحد بيقولهم اعملوا Webinars وهو الراجل ميزانيته متسمحش لكل دا
أضيف على كده إن أي حد يقدر يولّد Content بالـ AI في دقيقتين فالتفاصيل زادت والوضوح قل
فالـ Client اللي بييجي متلخبط مش بالضرورة ضعيف
أحيانا هو ذكي بس غرقان في خيارات كتير ومحتاج حد بس يقعد يرتب له الدنيا والأولويات
والشخص اللي يقدر يعمل ده يقدر يصنع Clarity من الغموض، يفصل الأعراض عن المشكلة الحقيقية، ويحول كلام عام لـ Direction محدد
بالتالي هو مش بيشوفوا مجرد منفذ
لكن بيحس انه فعلا شريك ليه
وأكتر حاجة بتبني الثقة في العلاقة مع الـ Client مش الـ Presentation الحلوة ولا الـ Deck المرتب
اللي بيبني الثقة إنك في أول Meeting تسأل سؤال يخليه يقول: فعلا محدش سألني ده قبل كده
لأن الـ Client في 2026 مش هيبقى محتاج حد يعمله Execution بس
محتاج حد يفكر معاه
والتفكير مش بيتقاس بالساعة
بيتقاس بجودة الأسئلة وحدة التشخيص ووضوح الاتجاه اللي بتحطه قدامه
طبعا وراء كل نقطة من دول تفاصيل كتير
من ازاي تبني أول Meeting تشخيصية لحد ازاي تحول Brief ضعيف لـ Scope واضح لحد ازاي تتعامل مع Buying Committee فيها ناس مختلفة كل واحد فيهم عنده أولوية مختلفة
بس لو فيه حاجة واحدة تمسكها من كل الكلام دا، خليها:
لما Client يبعتلك Brief مش واضح، الاختبار الحقيقي مش في قدرتك تنفذه
الاختبار في قدرتك تحوله لحاجة واضحة قبل ما تبدأ
اللي بيعرف يسأل قبل ما ينفذ، بيكسب الشغل، وبيكسب الـ Client كمان
عشان كدا قولت لك الـ Client مش تايه، انت بس لسه مسألتوش الأسئلة الصح
استفدت من المقال؟
شاركه مع شخص يحتاجه — أو خد الخطوة الجاية مع PrePilot.
