من أخطر الظواهر اللي انتشرت الفترة دي، تحت مسمى "ذكاء" أو "فهلوة" أو حتى "حق مكتسب": موظف بيمضي عقد 8 ساعات، يشتغل منهم ساعتين بضمير، والباقي "تقضية واجب".... أو حد شغال Remote، والشركة بتحاسبه على وقته، وهو بيستغل إن محدش شايفه ويقضيها نوم أو خروجات أو شغل مع أطراف/ جهات تانية!
يا جماعة، الموضوع ده مش بس "عدم مهنية".. لكنه فيه "تأصيل شرعي" مرعب لو ركزنا فيه، هنخاف على أكل عيشنا بجد
تعالوا نحط النقط على الحروف بعيداً عن كلام الـ HR، ونتكلم بكلام "الحق":
2- أنت "أجير خاص" (يعني وقتك مباع): شرعاً، الموظف اسمه "أجير خاص".... يعني إيه؟
يعني بمجرد ما مضيت العقد، الوقت المحدد للعمل ده (من 9 لـ 5 مثلاً) مبقاش ملكك.. ده بقى "ملك للشركة" مقابل الأجر اللي بتاخده....
فلو أخدت ساعة من الوقت ده قضيتها في "مصلحة شخصية" أو "نوم" أو "شغل لعميل تاني" من غير إذن صريح....
أنت هنا حرفياً "بتاخد فلوس مقابل وقت أنت مادتوش لصاحبه".... ده مش "تظبيط شغل".... ده في الشرع "أكل أموال الناس بالباطل"
2- ويلٌ للمطففين (مش بس في الميزان): كلنا عارفين الآية: "وَيْلٌ لِّلْمُطَفِّفِينَ الَّذِينَ إِذَا اكْتَالُوا عَلَى النَّاسِ يَسْتَوْفُونَ وَإِذَا كَالُوهُمْ أَو وَّزَنُوهُمْ يُخْسِرُونَ"
المفسرين والعلماء قالوا إن "التطفيف" مش بس في البيع والشراء... ده كمان في "حقوق العمل"... الموظف اللي بيطالب بحقوقه كاملة (المرتب، الزيادة، الأجازات) - يستوفون بس لما يجي يدي الشركة حقها (وقت، تركيز، إتقان) ينقّص ويكروّت - يخسرون هل ترضى تكون تحت وعيد الآية دي وأنت مش واخد بالك؟
3- الرقابة الذاتية (المُرَاقبة): خصوصاً في الشغل الـ Remote... مديرك مش شايفك.. الكاميرا مقفولة... التايم تراكر ممكن تتحايل عليه... بس "الله يراك"... القرش اللي بيدخل جيبك ده، لو مكنش طالع بجهد حقيقي ووقت حقيقي، هيمحق "البركة" من مرتبك كله... متستغربش لما تلاقي المرتب بيطير في أدوية، ومشاكل، وحوادث، ونكد.... البركة "جندي خفي"، بيجي لما العمل يكون "خالص" و"متقن"
💡 الرسالة والخلاصة: جملة "هما بيدفعوا ملاليم فأنا هديهم شغل بملاليم".. دي جملة شيطانية.... يا ترفض العقد من الأول.. يا طالما قبلت ومضيت، يبقى "أوفوا بالعقود"
أتقن شغلك عشان "الله يحب إذا عمل أحدكم عملاً أن يتقنه".. مش عشان المدير يحبك... أتقن شغلك عشان تطهر فلوسك.... وعشان تروح لبيتك بلقمة حلال فيها بركة وراحة بال...
الشغلانة اللي مش عاجباك سيبها.. بس طول ما أنت فيها، راعي ربنا فيها...
شاركونا.. إزاي بتحافظوا على تركيزكم وضميركم خصوصاً في الأوقات اللي مفيش فيها شغل كتير أو ضغط؟ 👇
#حكايات_مش_بتتقال_في_الميتنجات
استفدت من المقال؟
شاركه مع شخص يحتاجه — أو خد الخطوة الجاية مع PrePilot.
