بتخلص شغلك بسرعة وبجودة عالية؟.. مبروك، جائزتك هي (شغل زمايلك)!
.
.
.
فيه ظاهرة عالمية مرعبة اسمها "Performance Punishment" (عقاب الإجادة)
الظاهرة دي هي السبب رقم 1 في إن الشركات بتخسر "أشطر" ناس عندها وهم في قمة مجدهم
السيناريو بيمشي كالتالي: أنت موظف شاطر وسريع (Efficient).... التاسك اللي بياخد من غيرك 5 ساعات، أنت بتخلصه في ساعتين وبجودة أعلى... المنطق بيقول إن مكافأتك تكون "راحة" أو "تقدير" أو "فلوس زيادة"
بس الواقع في إدارة الشركات (التقليدية) بيقول غير كده: المدير بيشوفك فاضي، فبيقول: "طب خد بقى الملفات دي كمان خلصها عقبال ما زمايلك يخلصوا"
النتيجة؟
1- أنت بتشتغل ٣ أضعاف زمايلك (بنفس المرتب)
2- زمايلك "البط البلدي" بيتعودوا إنك هتشيلهم، فبيكسلوا أكتر (Social Loafing)
3- أنت بتتحرق (Burnout) وبتحس بالظلم
يا صديقي، لو أنت الشخص ده، لازم تفهم قاعدة مهمة جداً: "السرعة في الأداء.. سلعة غالية، متوزعهاش ببلاش"
لو أنت بتخلص شغلك بدري، ده مش معناه إن "وقتك مستباح"
ده معناه إنك طورت مهارة (Efficiency) تستحق عليها المقابل، مش العقاب
💡 إزاي بقا تحمي نفسك من "عقاب الإجادة"؟
1- ماتكشفش كل كروتك: مش لازم توري الإدارة إنك بتخلص في "نص ساعة" كل مرة... سيب لنفسك براح (Buffer) للمراجعة وللتطوير وللراحة... السرعة القصوى بتستخدم في الطوارئ بس
2- قانون "المقايضة" (Trade-off): لما مديرك يرمي عليك شغل زيادة عشان أنت شاطر، رد بجملة سحرية: "تمام يا ريس، أنا ممكن أشيل التاسك الجديد ده، بس ده هيجي على حساب التاسك (س)، تحب نأجل مين فيهم؟" الجملة دي بتفكر المدير إن "طاقتك محدودة" وإنك مش "ماكينة لا نهائية"
3- ارفض "شيل" شغل غيرك: ساعد زمايلك؟ آه طبعاً... تشيل شغلهم عشان هم مكسلين؟ لأ وألف لأ... لما بتعمل شغل غيرك، أنت بتضر الشركة لأنك بتداري على "نقطة ضعف" في الفريق لازم تتعالج
الخلاصة: الشطارة نعمة.. بس لو مكنش ليها "حدود" وسور عالي يحميها.. هتتحول لنقمة وهتخليك "حمار الشغل" اللي الكل بيركب عليه
كونك "كفء" لا يعني إنك "متاح" للأبد
مين هنا لقى نفسه بيشيل شغل القسم كله لمجرد إنه (بيخلص بسرعة)؟ وازاي قدرتوا تخرجوا من الدايرة دي؟ 👇
#حكايات_مش_بتتقال_في_الميتنجات
استفدت من المقال؟
شاركه مع شخص يحتاجه — أو خد الخطوة الجاية مع PrePilot.
